Archive for செப்ரெம்பர், 2006

மன்னார் வளைகுடாவில் சீனா: “இந்திரா” நிலைப்பாடு மேற்கொள்ளுமா இந்தியா?

செப்ரெம்பர் 11, 2006

மன்னார் வளைகுடா பகுதியில் எண்ணெய் அகழ்வுப் பணிக்காக சீனாவையும் சிறிலங்கா அரசாங்கம் அனுமதித்திருப்பதன் மூலம் இந்தியாவின் இறைமைக்கு சிறிலங்காவால் பாரிய நெருக்கடி கொடுக்கப்பட்டுள்ளது.
மன்னார் பிரதேசத்தில் 2 ப்ளொக்குகளில் இந்தியாவும் சீனாவும் எண்ணெய் அகழ்வுப் பணிகளை மேற்கொள்ளலாம் என்று சிறிலங்கா அமைச்சரவை தற்போது ஒப்புதல் அளித்துள்ளது.

தெற்காசிய பிராந்தியத்தின் இரு பெரும் போட்டி வல்லரசுகளாக சீனாவும் இந்தியாவும் உள்ளன.

இராஜதந்திர களத்தில் மோதுநர்களாக உள்ள இந்த இரு வல்லரசுகளும் தங்களது ஆளுமையையும் வலுவையும் வெளிக்காட்டுவதற்கான வியூகங்களை தொடர்ச்சியாக கையாண்டு வருகின்றன.

இப்படியான நிலையில் மன்னார் வளைகுடாவில் சீனாவை சிறிலங்கா இறக்கிவிட்டிருப்பது என்பது இந்தியாவின் இறைமைக்கு சிறிலங்காவால் விடுக்கப்பட்டிருக்கிற பாரிய அச்சுறுத்தல்தான்.

மன்னாரும் எண்ணெய் அகழாய்வும்
மன்னார் வளைகுடாவை அண்மித்திருப்பது “காவேரி பேசின்” எனப்படுகிற பாரிய எண்ணெய்படுகையாகும். காவேரி படுகையானது தமிழ்நாட்டில் 65 விழுக்காடு அமைந்துள்ளது. அதன் தொடர்ச்சியானது தெற்கே மன்னார் பிரதேசத்தில் இலங்கைப் பகுதியில் 35 விழுக்காடு உள்ளது.

தமிழ்நாட்டின் காவேரிப் படுகையில் எண்ணெய் வளமிருப்பதாகவும் அதனை ரஸ்யா உறுதி செய்துள்ளதாகவும் கடந்த 1956 ஆம் ஆண்டு யூன் 12ஆம் நாளன்று இந்திய அமைச்சர் கே.டி.மாலவியா பெங்களுரில் அறிவித்தார். அதன் பின்னர் இந்தியாவின் பிரதான எண்ணெய் படுகைகளில் ஒன்றாக காவேரிப்படுகை உருவெடுத்தது.

ஈரானிய எல்லையோரம் பாகிஸ்தானில் உள்ள கத்வார் துறைமுகத்தை பெருந்தொகையில் உருவாக்கி அரபிக் கடல் பகுதியிலும் இந்தியாவுக்கு ஒரு அச்சுறுத்தலை சீனா ஏற்படுத்தி உள்ளது.

இப்படியான ஒரு முற்றுகைப் பின்னலில் இந்தியாவை சுற்றி சீனா நிற்கிறது.
இந்தியாவின் பாரிய சந்தையாகக் கருதப்படுகிற தென்னிந்தியாவை இலக்கு வைத்துத்தான் ஏற்கனவே சிறிலங்காவில் சீனா முதலீடு செய்து வருகிறது.

தமிழீழ மூத்த அரசியல் ஆய்வாளர் திருநாவுக்கரசு தெரிவித்திருந்தது போல், தென்னிந்திய சந்தையினூடாக சீனாவுக்கு கிடைக்கப் போகும் இலாபத்தை கணக்கிடுகையில் சிறிலங்காவில் சீனா செய்யும் செலவானது ஒரு “முதலீடு”தான்.

இப்படியான ஒரு சூழ்நிலையில் தென்னிந்தியாவை எளிதில் அவதானிக்கக் கூடிய- இந்தியப் பாதுகாப்புத்துறையின் மையமாக விளங்கக் கூடிய தென்னிந்தியாவை அவதானிக்கக் கூடிய- ஊடுருவக்கூடிய வாய்ப்புள்ள மன்னாரில்தான் சீனாவை சிறிலங்கா அனுமதித்திருக்கிறது.

இந்தியாவும் சிறிலங்காவும்
இலங்கைத் தீவின் வடக்கு-கிழக்கில் வாழும் தமிழர்களும் இந்திய பிரதேசத்தில் வாழுகிற தமிழர்களும் தொப்புள்கொடி இரத்த உறவுகள். வரலாற்றுக் காலங்களில் தமிழர் இராச்சியங்களும் சிங்களவர் இராச்சியங்களும் வெவ்வேறாக இருந்தமையால் தமிழ்நாட்டுடனான தமிழீழ இராச்சியங்களின் உறவானது நல்லுறவாக இருந்தது.
ஆனால் இங்கிலாந்து நாட்டவரின் காலனி ஆதிக்க முடிவின் கீழ் நிறைவேற்றப்பட்ட அரச அதிகார மாற்றத்தில் சிங்களவர்களின் மேலாதிக்கத்தின் கீழ் தமிழர்கள் வாழ வேண்டிய நிலைமை உருவாக்கப்பட்டது.

இந்தியாவிலும் தமிழ் மன்னர்களால் நிர்வகிக்கப்பட்ட பிரதேசங்களும், ஆங்கிலேயர் உள்ளிட்ட அன்னியர் வருகையால் ஒருங்கிணைக்கப்பட்ட இந்தியப் பகுதியாக்கப்பட்டது.
இந்தியா மற்றும் சிறிலங்கா ஆகிய இரு நாடுகள் உருவாக்கப்பட்ட காலத்திலிருந்து இருதரப்புக்கும் எந்தவித நல்லுறவுக் காலம் என்பது எப்போதும் இருந்ததாக இல்லை.
இந்திய இராணுவத்தின் ஓய்வுபெற்ற அதிகாரி லெப். கேணல் தாக்குர் குல்தீப் எஸ்.லுத்ரா தனது கட்டுரை ஒன்றில் இந்தியாவுக்கு எதிரான சில சிறிலங்காவின் நடவடிக்கைகளை இப்படிப் பட்டியலிடுகிறார்….

– 1977 ஆம் ஆண்டுக்கும் 1983 ஆம் ஆண்டுக்கும் இடைப்பட்ட காலத்தில் ஈழத் தமிழர்களின் போராட்டத்தை ஒடுக்க பாகிஸ்தானிடமிருந்தும் இஸ்ரேலிடமிருந்தும் சிறிலங்கா ஆயுதக் கொள்வனவு செய்தத
– சிறிலங்காவின் மேற்குக் கடலோரப் பகுதியான சிலாபத்தில் வொய்ஸ் ஒப் ஆப் அமெரிக்கா ஒளிபரப்புக்கான வசதிகளை ஏற்பாடு செய்துகொடுத்தது. அது பெயரளவிலான ஒளிபரப்பு. ஆனால் இலத்திரனியல் உளவுப் பணிகளுக்காக அமைக்கப்பட்டத
– திருகோணமலையில் உள்ள எண்ணெய்க் கிடங்குகளை சீரமைக்க அமெரிக்க நிறுவனத்துக்கு சிறிலங்கா ஒப்புதல் அளித்தது. இதற்காக இந்தியாவின் ஒப்பந்த கோரலானது சிறப்பாக இருந்தபோதும் அமெரிக்க நிறுவனத்தை அனுமதித்தது.
– இந்தியத் தலைவர்களை சிறிலங்கா தலைவர்கள் இழிவுபடுத்தும் செயலையும் செய்தனர். உதாரணமாக பிரேமதாசவை நரசிம்மராவ் சந்திக்கச் சென்றபோது தேவையின்றி காக்க வைத்திருந்தனர் என்று பட்டியலிடுகிறார்.
மேலும்
1947-48 ஆம் ஆண்டு இந்திய-பாகிஸ்தான் போரில் நடுநிலைமை வகிப்பதாகக் கூறிவிட்டு அப்போதைய சிறிலங்கா அரச தலைவர் சேர்.ஜொன் கொத்தலாவல, பாகிஸ்தானை ஆதரித்தார்.

இதே “நடுநிலை” நிலைப்பாடுதான் 1962 ஆம் ஆண்டு இந்திய-சீன யுத்தத்திலும் மேற்கொள்ளப்பட்டது.

1971 ஆம் ஆண்டு டிசம்பர் மாதம் இந்தியாவினால் உருவாக்கப்பட்ட வங்கதேசத்தை 1972 ஆம் ஆண்டு வரை சிறிலங்கா அங்கீகரிக்க மறுத்தே வந்தது.
அண்டை நாடான இந்தியாவுக்கு எதிரி நாடுகளாக- யுத்த களத்திலே மோதிக் கொண்டிருக்கும் பாகிஸ்தான் மற்றும் சீனாவுடனேயே நல்லுறவு கொண்ட நாடாக சிறிலங்கா தொடர்ச்சியாக இன்னமும் இருந்து வருகிறது.

தற்போதைய அரச தலைவர் மகிந்த ராஜபக்ச, இந்தியாவிடமிருந்து தமக்கு இராணுவ உதவி கிடைக்கவில்லை என்றதும் சிறிலங்காவில் உள்ள இந்திய நிறுவனங்களை வெளியேற்ற முயற்சிப்பதும், இந்தியாவை சீண்டும் வகையில் பாகிஸ்தானுக்கு இராணுவ தளம் அமைக்க உதவுவதுமான செயற்பாடுகளை தொடர்ச்சியாக மேற்கொண்டு வருவது என்பது சிங்களத்தின் வரலாற்றுப் புத்திதான்.

சிறிலங்காவும் சீனாவும்
சிறிலங்காவுக்கும் சீனாவுக்குமான நல்லுறவானது 1952 ஆம் ஆண்டு அரிசி மற்றும் ரப்பர் வர்த்தகத்தினூடாகத் தொடங்குகிறது.
1957 ஆம் ஆண்டுகளில் இரு நாடுகள் என்கிற அடிப்படையிலான இராஜதந்திர உறவாக வளரத் தொடங்கியது இது.
1961 ஆம் ஆண்டு திருமதி பண்டாரநாயக்க சீனா பயணம் மேற்கொண்டார். 1964 ஆம் ஆண்டு அப்போதைய சீனாவின் அரச தலைவர் சிறிலங்காவுக்கு நல்லுறவுப் பயணம் மேற்கொண்டார்.

1983 ஆம் ஆண்டு இனக்கலவரம் வெடித்தது. ஆயிரக்கணக்கான தமிழர்கள் கொன்று குவிக்கப்பட்டனர். தமிழகம் அதிர்ந்தது. தமிழ்நாடு முதல்வராக இருந்த எம்.ஜி.ஆர். முழுமையாகவே தமிழீழத் தமிழர்களுக்கு ஆதரவாக இருந்தார். தமிழீழத்தின் மூலை முடுக்கெல்லாம் பேரெழுச்சியும் கொந்தளிப்புமாக இருந்தது. சிறிலங்கா அரசாங்கம் மீது சீற்றத்துடன் இருந்த இந்தியாவின் ஒட்டுமொத்த கட்டமைப்பும் அப்போது ஏற்பட்ட சூழ்நிலைக்கு அமைவாக தமிழர் போராட்டத்தை ஆதரித்து நின்றது.
தமிழீழத்தின் ஆயுதப் போராட்டத்துக்கு ஆயுதங்களும் பயிற்சியும் கொடுத்தது. சிங்களம் நடுங்கிப் போனது. அப்போதைய அரச தலைவர் ஜே.ஆர். ஜயவர்த்தனவின் சகோதரர் எச்.டபிள்யூ. ஜயவர்த்தன வெளிநாடுகளின் உதவி கோரி ஓடிப்போனார். சிங்கப்பூர், மலேசியா, தாய்லாந்து, இந்தோனேசியா, தென்கொரியா, சீனா, ஜப்பான், அவுஸ்திரேலியா, நியூசிலாந்து என ஒட்டுமொத்த தென்கிழக்காசிய நாடுகளிடம் முட்டிப் பார்த்தார். இதில் சீனாதான் ஆதரவாக நின்றது.

ஜே.ஆர். அத்துடன் நிற்கவில்லை.
தனது வெளிவிவகார அமைச்சராக ஏ.சி.எஸ். ஹமீதை அமெரிக்காவின் இராணுவ உதவி கோரி அனுப்பினார். மலேசியா, பாகிஸ்தான் மற்றும் வங்கதேச நாடுகளுக்கும் அவர் பயணம் மேற்கொண்டார். இதற்கும் அப்பால் 1984 ஆம் ஆண்டு யூன் 14 ஆம் நாளன்று ஜே.ஆர். ஜயவர்த்தனவே சீனா, ஜப்பான், கொரியா, அமெரிக்கா, இங்கிலாந்து நாடுகளுக்கு நேரடியாகச் சென்று பேச்சுக்களை நடத்தினார். சீனாவின் அரச தலைவராக இருந்த லி சியான் நன்னிடம் புலம்பித் தள்ளினார். சீனாவின் பிரதமராக இருந்த ஜயோ ஜிங் யங்கிடமும் பேசினார்.

இந்தியாவுடன் மல்லுக்கு நின்ற சீனா இச்சந்தர்ப்பத்தை பயன்படுத்தி சிறிலங்காவை ஆதரித்து நின்றது.

சீனாவுக்கான கதவுகளை அகலத்திறந்து வைப்பதாகக் கூறி கடற்படைக்கான இராணுவ உதவிகள் வேண்டும் என்றும் கேட்டார். சீனாவின் சக்திவாய்ந்த நபராக இருந்த கம்யூனிச இராணுவத்தின் தலைவர் டெங்க் ஜியாபோங்கையும் ஜயவர்த்தனா சந்தித்துப் பேசினார்.
ஜயவர்த்தன மற்றும் அவரது சகோதரரின் பயணத்திற்குப் பின்னர்தான் சிறிலங்காவுக்கான தனது ஆயுத உதவியை பெருந்தொகையாக சீனம் வழங்கியது. சீனா குழுவினரும் 1984 ஆம் ஆண்டு யூலையில் கொழும்பு வந்தது. அப்போது தேசிய பாதுகாப்பு அமைச்சராக லலித் அத்துலத் முதலியும் 1985 ஆம் ஆண்டு யூலை சீனா சென்றார்.

1984, 1990 மற்றும் 2001 ஆம் ஆண்டுகளின் இருதரப்பு பயணங்களினூடாக சீனாவும் சிறிலங்கா உறவில் மிக நெருக்கமான உறவு வளர்ந்து மிகப் பாரிய ஆயுத உறவாக விரிவடைந்தது.

2001 ஆம் ஆண்டில் சிறிலங்காவில் சீனாவின் முதலீட்டு மதிப்பானது 13 மில்லியன் அமெரிக்க டொலராகவும் உயர்ந்தது.

மன்னார் பிரதேசத்தில் சேதுக்கால்வாய் திட்டம் தொடங்கப்பட்ட நிலையில் கொழும்பு துறைமுகத்தின் வர்த்தகத்துக்கு பேரிழப்பு ஏற்படும் என்ற நிலையில் சேதுக்கால்வாய் திட்டத்துக்குப் போட்டியாக அம்பந்தோட்டை துறைமுகத்தை சீரமைத்துக் கொண்டிருக்கிறது சீனா என்கிற வகையில் சீனாவும் சிறிலங்காவும் பின்னிப் பிணைந்து நிற்கின்றன.

ஆம். சீனாதான் இப்போது சிறிலங்காவின் நம்பிக்கைக்குரிய பாதுகாவலன்.

(பாகிஸ்தான், சிறிலங்கா இடையேயான உறவு நிலை குறித்த புதினத்தின் செய்திகளையும் இந்தப் பின்னணியில் படிப்பாளர்கள் உள்வாங்கிக் கொள்ளவும்)

இந்தியா செய்ய வேண்டியது என்ன?
இந்தியா ஒரு நாடாக உருவாக்கப்பட்ட நிலையில் இந்தியாவின் பிரதேச பாதுகாப்பு நலன் கருதி நேபாளம், சிக்கிம், பூட்டான், மாலைதீவு நாடுகளின் வெளியுறவுக் கொள்கையை மறைமுகமாக தன் வசமே இந்தியா இன்றளவும் வைத்திருக்கிறது. சிறிலங்காவைப் பொறுத்தவரையில் எச்சரிக்கை மனோநிலையில் விட்டு வைத்திருந்தது.

வங்கதேசத்தின் போரின்போது பாகிஸ்தானுக்கு சிறிலங்கா பகிரங்கமாக உதவி செய்து தனது “துணிச்சலை’ வெளிப்படுத்திக் கொண்டது.

1980 ஆம் ஆண்டு புதுடில்லியில் நடைபெற்ற பொதுநலவாய மாநாட்டின் தொடக்க உரையில், “கடந்த காலத்தில் இந்து சமுத்திரமானது ஆங்கிலக்காரர்களை இந்தியாவுக்கு அழைத்து வந்தது. இன்று இப்பிராந்தியம் ஓர் அபாயகரமான கொந்தளிப்பாகக் காட்சியளிக்கிறது. இந்து சமுத்திரத்தில் கட்டு மீறியளவு அதிகரித்து வருகின்ற தீவிர இராணுவ மயமாக்கத்தின் வேகமானது 5,600 கிலோ மீற்றர் நீளமான இந்தியாவின் கடற்கரையோர எல்லைப்புறப் பாதுகாப்பை மிகப் பலவீனமாதாக ஆக்கியுள்ளது. எமது பாதுகாப்புக்கு அச்சுறுத்தலாக அந்நிய நாடுகளின் இராணுவத் தளங்கள் இப்பிராந்தியத்தில் அமைந்திருப்பதையும் இப்பிராந்தியத்தில் அந்நிய யுத்தக் கப்பல்கள் பவனி வருவதையும் நியாயப்படுத்தக் கூடிய எந்த ஒரு கோட்பாட்டினையும் எம்மால் எப்படி ஏற்றுக் கொள்ள முடியும்?” என்று கேள்வி எழுப்பியவர் இந்திரா காந்தி அம்மையார்.

இந்திரா காலத்தில் 1981 ஆம் ஆண்டு இந்திய வெளிவிவகார அமைச்சின் ஆண்டு அறிக்கையில், உலகப் பதற்ற நிலையின் மையம் ஐரோப்பாவிலிருந்து ஆசியாவிற்குத் திருப்பிவிடப்பட்டுள்ளது இந்து சமுத்திரத்தில் கட்டுமீறி நிர்மாணிக்கப்படுகின்ற இராணுவ, கடற்படைத் தளங்களும் புதிய அணிச்சேர்வுக்கான தேடல்களும் மேற்காசியாவில் உள்ள பொதுவான பதற்ற நிலைமையும் பாகிஸ்தான் உட்பட இந்நாடுகளுக்கு விநியோகப்படும் நவீன ரக ஆயுதங்களும் இதனை ஊர்ஜிதப்படுத்துகின்றன. இத்தகைய வளர்ச்சிப் போக்குகள் இந்தியாவின் பாதுகாப்பை பெரிதும் பாதுகாப்பதாகவும் அச்சுறுத்துவதாகவும் அமைந்துள்ளன என்று எச்சரித்தது.

அதேபோல் 1980-1981 ஆம் ஆண்டு இந்திய பாதுகாப்பு அமைச்சின் அறிக்கையிலும் கூட, “டியாகோ கார்சியாவில் அமைந்துள்ள இராணுவத் தளம் இந்தியாவின் பாதுகாப்புக்கு பெரும் அச்சுறுத்தலாக இருப்பதுடன் இப்பிராந்தியத்தின் அரசியல் நிலைப்பாட்டுக்கும் பெரும் அச்சுறுத்தலாக அமைந்துள்ளது” என்று அமெரிக்காவை அச்சுறுத்தியது.
திருகோணமலை துறைமுகத்தில் இருந்த எண்ணெய் குதங்கள் (கிடங்குகளை) சீர்படுத்தும் பணியூடாகவும் வொய்ஸ் ஓஃப் அமெரிக்கா வானொலித் தளம் அமைப்பதற்கும் அமெரிக்காவுக்கு சிறிலங்கா சமிக்ஞை கொடுத்த போதும் அதிரடியாக பகிரங்கமாக இந்திரா அம்மையார் நிலைப்பாடு மேற்கொண்டார்.

இந்திராவின் கடுமையான நிலைப்பாட்டினால் திக்கித் திணறிப் போன சிறிலங்கா அமெரிக்காவிடமும் சரணாகதி அடையத் தவறவில்லை. அப்போதைய அமெரிக்க அரச தலைவர் றீகனுடன் பேச்சுக்கள் நடத்தினார் ஜயவர்த்தன. அமெரிக்காவிடம் இந்தியாவை காட்டிக் கொடுத்து இராணுவ உதவி கோரினார். அமெரிக்காவுக்கு வானொலி ஒளிபரப்புத் தளம் என்று சொல்லப்படுகிற உளவுத்தளம் அமைக்க திருகோணமலையில் 250 ஏக்கர் நிலம் தருவதாக வாக்குறுதி தந்துவிட்டு வந்தார் ஜயவர்த்தன.

திருகோணமலையில் அமெரிக்காவின் தளம் அமைக்கப்படுகிற செய்தி அறிந்த இந்திரா அம்மையார், இந்திய நாடாளுமன்றத்திலேயே கடுமையாக சிறிலங்கா எச்சரித்தார். வேறு வழியின்றி சிறிலங்காவும் அமெரிக்காவும் வாலைச் சுருட்டிப் படுத்துக் கொண்டன.
இந்திராவைத் தொடர்ந்து அவரது மகன் ராஜீவ் ஆட்சிப் பொறுப்பேற்ற காலத்திலும் இது இன்னமும் வலுவடைந்து ஒப்பந்த அளவிற்கும் சென்றது.

திருகோணமலை துறைமுகத்தில் இந்தியாவின் அனுமதியின்றி எந்த ஒரு நாட்டையும் அனுமதிக்கக் கூடாது என்று இந்திய-இலங்கை ஒப்பந்தத்திலேயே இடம்பெற்றது.
ஆனால் இந்திரா காந்தியைப் போல் இந்திய அரச கட்டமைப்பு ஒட்டுமொத்தமாக ஒரே நிலைப்பாட்டில் இருக்கவில்லை. இந்திரா காலத்தில் இலங்கைப் பிரச்சனையில் தூதுவராக செயற்பட்ட ஜி.பார்த்தசாரதி மாற்றப்பட்டு அவமதிக்கப்பட்டு வெளியேற்றப்பட்டு குழப்பகரமான நபரான ரொமேஷ் பண்டாரி நியமிக்கப்பட்டார்.

எந்த அமெரிக்காவை எந்த இந்திரா எதிர்த்து முழக்கமிட்டு வந்தாரோ அந்த இந்திராவின் மகன் ராஜீவ் அமெரிக்காவின் நாடாளுமன்றத்திலேயே சிறப்பிக்கப்பட்டு குளிரூட்டப்பட்டார்.

சிறிலங்காவோ சும்மாவும் இருக்கவில்லை. ராஜீவ் வலுவற்றவர் என்பதை உணர்ந்து கொண்ட சிறிலங்கா அரசாங்கமும், ராஜீவை பலவீனப்படுத்திய இந்திய கொள்கை வகுப்பாளர் குழுவும் கரம் கோர்க்க தடுமாற்றமுள்ள பிரதமராக ராஜீவ் மாற்றப்பட்டார்.

அதன் பின்னர் அரசியலின் போக்குகள் மாறிவிட்டன.
இலங்கை இனப்பிரச்சனையில் தமிழ்நாட்டின் எழுச்சியை மனதில் கொண்டு அரசியல் ரீதியாக காய்கள் நகர்த்தப்பட்டு- அதற்கு அமைவாக ஒட்டுமொத்த இந்திய அரச கட்டமைப்பும் இயங்கி வந்த முன்னைய முதிர்வு நிலைமை மாறி கொள்கை வகுப்பாளர்களின் கோட்பாடே இந்திய அரசின் கோட்பாடாக ஏறக்குறைய 15 ஆண்டு காலத்துக்கும் அதிகமாக உருவெடுத்து இறுக்கமடைந்து நிற்கிறது.
இந்த இறுக்கமான நிலைப்பாடு என்பது இந்தியாவை எதிர்த்து- இந்தியாவின் எதிரி சக்திகளோடு கைகோர்த்துக் கொண்டிருக்கிற சிறிலங்காவுக்குச் சார்பானதாக இருக்கிறது என்பதுதான் வேடிக்கை.

ஈழத் தமிழர்களை ஒடுக்குவதற்காக எதிரி நாடுகளான பாகிஸ்தானும் இந்தியாவும் போட்டி நாடான சீனாவும் ஒருங்கிணைந்து சிறிலங்காவுக்கு ஆயுதங்களை வழங்குகின்றன.

சிறிலங்கா-சீனா-பாகிஸ்தான் மற்றும் இந்தியா தொடர்பில் இந்திய இராணுவத்தின் ஓய்வு பெற்ற அதிகாரி லெப். கேணல் தாக்குர் குல்தீப் எஸ். லுத்ரா எழுதிய மற்றொரு கட்டுரையில் இடம்பெற்றுள்ள விடயங்களை இந்த விடயத்துக்குச் சுட்டிக்காட்டுவது சரியாக இருக்கும் என கருதுகிறோம்.
அவர் கள எதிர்கூறல்கள் என்ற அடிப்படையில் முன்வைக்கிறார்….

– சர்வதேச அளவில் இந்தியாவுக்கும் சீனாவுக்கும் இடையே முறுகல் நிலை ஏற்படும் போது சிறிலங்காவனது அமெரிக்காவின் பக்கம் நிற்குமாக இருந்தால் இந்த பிரதேசம் பாரிய போர்க்களமாக இருக்கும். இந்தியாவுக்கு எதிராக தனது டிகோ கார்சியா, சிறிலங்காவின் கொழும்பு, திருகோணமலை மற்றும் சிங்கப்பூர் தளங்களிலிருந்து அமெரிக்கா இயங்கும். அந்த நிலையில் சிறிலங்கா- அமெரிக்கக் கூட்டை எதிர்ப்பதில் பிரதான பங்கேற்பாளர்களாக ஈழத் தமிழர்கள்தான் இருப்பார்கள.

– ஆசிய பிராந்திய அளவில் இந்தியாவுக்கும் சீனாவுக்கும் இடையே முறுகல் நிலை ஏற்படும் நிலையில் சிறிலங்காவானது சீனாவின் பக்கம் நிற்கும் போது பாகிஸ்தானும் அந்த அணியில் இணைந்து முக்கூட்டு உருவாகும். அப்போது இந்தியாவின் கப்பற்படையை அந்த அணி வீழ்த்தும் சாத்தியம் உள்ளது. அந்த அணிக்கு எதிராக மூன்றுக்கும் மேற்பட்ட களமுனைகளை இந்தியா உருவாக்க வேண்டியதிருக்கும்.

– பிரதேச அளவில் சிறிலங்காவும் பாகிஸ்தானும் இணைந்து நிற்பதானது இந்தியாவுக்கு சிக்கலானதாக இருக்கும். அந்த நிலைமையில் இலங்கையில் உள்ள தமிழர்களை இந்தியா ஆதரிக்க வேண்டும். சிறிலங்காவோடு சீனா இணையாமல் திருகோணமலை துறைமுகத்தை இந்தியா காப்பாற்ற வேண்டியதிருக்கும் என்கிறார் அவர்.

ஈழத் தமிழர்களை ஆதரித்து இந்திரா அம்மையார் நின்ற நிலைப்பாடு மிகச் சரியானது என்பதையும் ஈழத் தமிழர்கள்தான் இந்தியாவுக்கு ஆதரவாக இருப்பார்கள் என்பதையும் ஒரு “கோட்பாடாக” அன்று இந்திரா புரிந்து கொண்டார்.

தமிழ்நாட்டில் தற்போதும் எழுந்திருக்கிற 1980-களின் எழுச்சியானது இந்திய கூட்டரசு அரசியலில் ஒருவித தாக்கத்தை உருவாக்கியிருக்கிறதுதான்.

ஆனால் இறுக்கமடைந்து நிற்கும் ஒரு வினோதமான வெளியுறவுக் கொள்கையைக் கொண்டிருக்கும் இந்திய கொள்கை வகுப்பாளர்களோ குழப்பவாதத்திலும் இந்திய இறைமைக்கு எதிராகவுமே செயற்பட்டு வருகின்றனர்.
இப்போதும் தமிழீழத்தை இந்தியாவின் “றோ” முற்றுகையிட்டு குழப்பகரமான வேலைகளைச் செய்து வருகிறது.

தமிழீழ விடுதலைப் புலிகளுக்கு எதிராக சக்திகள் இருப்பதான தோற்றத்தை உருவாக்குவதற்காக இப்பவும் இந்தியாவின் “றோ” வானது, ஈ.என்.டி.எல்.எஃப். போன்ற குழுக்களுக்கு ஆட்சேர்க்கும் பணியில் தமிழ்நாட்டில் ஈடுபட்டு வருகிறது.
தன்னால் எந்த வகையான குழப்பங்களை எல்லாம் ஈழத் தமிழ் மண்ணில் உருவாக்க முடியுமோ அப்படியான செயற்பாடுகள் அனைத்தையும் “றோ” அதிகரித்துள்ளது.
ஆனால் இலங்கை இனப்பிரச்சனையில் இந்திய கொள்கை வகுப்பாளர்கள் கொண்டிருக்கும் நிலைப்பாடானது வினோதமானது மட்டுமல்ல- இந்தியாவின் இறைமைக்கே விரோதமானதுதான் என்பதை வெளிப்படுத்தும் வகையில்தான் எந்த சிறிலங்காவுக்கு ராடார்களை அள்ளிக் கொடுக்க அறிவுறுத்தினார்களோ அந்த சிறிலங்காவேதான் இந்தியாவின் மன்னார் பிரதேசத்திலேயே போட்டி நாடான சீனாவை அகழ்வுப் பணிக்கு அனுமதித்திருக்கிறது.

இந்திய இறைமைக் காப்பாளர்களாக இருக்க வேண்டிய “றோ” போன்ற கொள்கை வகுப்புக் கோட்பாட்டாளர்கள் ஆயுத சந்தையில் இறைமையை கூவி விற்கும் கேடாளர்களாக் மாறியிருக்கிறார்கள்.

சிறிலங்கா விடயத்தில் முன்னைய இந்திய பிரதமர் “இந்திரா”வின் நிலைப்பாட்டை- இந்தியா மேற்கொள்வதுதான் தனது இறைமைக்கு விடுக்கப்பட்டிருக்கிற சவாலை முறியடிப்பதாக இருக்கும் என்கிற வரலாற்று ரீதியான கோட்பாட்டை “மன்னார்- சீனா” உள்நுழைவு இனியேனும் புரியவைக்கட்டும்.
நன்றி>புதினம்.

மகிந்தரின் பிரித்தானிய சரணாகதி ஏன்?

செப்ரெம்பர் 10, 2006

பிரித்தானியாவிற்கான உத்தியோகப்பற்ற திடீர் பயணமொன்றை சிறிலங்கா அரச தலைவர் மகிந்த ராஜபக்ச மேற்கொண்டுள்ளார்.

சந்திரிகா அம்மையாருடன், தமது கட்சிக்குள் ஏற்பட்டுள்ள நெருகடிகளைத் தீர்க்கும் வண்ணம் பேச்சுவார்த்தை நடத்த இலண்டன் வந்துள்ளார் என்று சில செய்தி நிறுவனங்கள் ஊகம் வெளியிட்ட நிலையில் அவரின் பயணமானது, அதற்கும் பாற்பட்டதொரு நகர்விற்கான பயணமாகக் கருத இடமுண்டு.

இருப்பினும் பிரித்தானியா என்கிற பின்கதவால் இந்தியாவை அணுகும் அதிரடி இராஜதந்திர நகர்வாகவே இதனை நோக்கலாம்.

பாகிஸ்தானின் இலங்கைப் பிரசன்னம் குறித்து நோர்வேயிடம் இந்தியா சுமத்திய குற்றச்சாட்டினால் எழுந்த புதிய சிக்கல்களால் தடுமாறிய ராஜபக்ச, பிரித்தானியாவினூடாக சில நகர்வுகளை மேற்கொள்ள முயற்சிக்கிறார்.

அத்துடன் அதிகரித்து வரும் தமிழக எழுச்சிக் கோலங்கள், இந்திய மத்திய அரசின் இலங்கை தொடர்பான வெளியுறவுக் கொள்கையில் மாறுதல்களை உருவாக்கலாம் என்கிற பதற்றமும் மகிந்தரைத் தொற்றிக் கொண்டுள்ளது.

அன்மைக்காலமாகவே, கண்காணிப்புக் குழுவின் மாதாந்த அறிக்கைகளும், .நா. சபையின் உப பிரிவுகளின் நேரடி களநிலவரச் சாட்சியங்களும் சிறிலங்கா அரசுக்குச் சாதகமாக அமையவில்லை.

இதில் கவனிக்கப்பட வேண்டிய இன்னுமொரு முக்கிய செய்தியானது, சமாதான முயற்சிகளின் அனுசரணையாளராக விளங்கும் நோர்வே ஊடாகச் சாதிக்க முடியாத விடயமொன்றை நோர்வேயின் பின்தளச் சக்திகளில் ஒன்றான பிரித்தானியாவைப் பயன்படுத்தி தமக்குச் சாதகமான கருத்து நிலையை ஏற்படுத்தவும் மகிந்தர் முயற்சிக்கிறார்.

இருப்பினும் இலங்கை விவகாரத்தில் இந்தியாவின் நேரடிப் பங்களிப்பிற்குரிய அகச் சூழ்நிலை உருவாக்கப்படுவதற்கு முன், சமாதான முன்னெடுப்புக் களத்தில் ஏற்கனவே நிலை கொண்டுள்ள சார்புச் சக்திகளை ஒன்று திரட்டுவதிலும், பயங்கரவாதத்திற்கு எதிரான போர் என்கிற பொதுக் கருத்தியலைத் தக்க வைக்கவும் மகிந்தர் வேகமாகச் செயற்படுகிறார்.

இதுவரை காலமாக, இந்து சமுத்திரப் பிராந்தியத்தில் தனது தனித்துவத்தைப் பேணிவந்த இந்தியா, அண்மைக் காலமாக மேற்குலக அச்சோடு பயணிக்க முயல்வதனையும், அவர்களோடு இணைந்து சிங்கள மக்கள் ஏற்றுக்கொள்ள மறுக்கும் அரசியல் தீர்வொன்றினை தம்மீது வலிந்து திணிக்க முயற்சிக்கலாம் என்ற அச்சமும் சிறிலங்கா அரசிடம் ஏற்பட்டுள்ளது.

ரணிலுடன் இணைந்து பொதுக்கருத்தினை உருவாக்கி, இனப்பிரச்சனைக்கான தீர்வுத் திட்ட வரைபினை முன்வைக்கும் வரையான காலத்தில், புலிகளின் தாக்குதல்களிலிருந்து அரசினைப் பாதுகாக்க, இராணுவ உபகரண உதவிகளையும் பிரித்தானியாவிடம் கோரலாம்.

தனது பலத்தை அதிகரிக்கவும், அதிகரித்து வரும் பொருளாதாரச் சுமையினைக் குறைக்கவும், மேற்குலகு திருப்திபடும்படி அடுக்கடுக்கான வாக்குறுதிகளை அள்ளி வீசவும் சிங்கள ஆட்சியாளர்கள் தயங்கமாட்டார்கள்.

இருப்பினும்எதைப் பற்றி பேசுவதாயினும், தமது மேற்குலகின் பிரதிநிதி நோர்வேயை அணுகுங்கள்என்பதே பிரித்தானியாவின் பதிலாக அமையலாம்.

நன்றி>புதினம்.

வைகோவுடன் தமிழ்த் தேசியக் கூட்டமைப்பினர் சந்திப்பு.

செப்ரெம்பர் 9, 2006

கேள்வி: இலங்கை விவகாரத்தில் இந்தியாவின் தலையீடு எப்படி அமைய வேண்டும் என நினைக்கிறீர்கள்?
பதில்: காலப்போக்கில் இந்திய அரசு நல்ல முடிவு எடுக்கும் என நம்புகிறோம்.
கேள்வி: இடையில் இந்தியா தீர்வுத்திட்டம் ஒன்று கொடுத்ததாக வெளியான தகவல்; குறித்து?
பதில்: இறுதியில் நாங்கள் ஏற்றுக்கொள்ளக்கூடிய வகையில் இந்தத்தீர்வு அமையும் என நினைக்கிறோம். அப்படி இருக்க வேண்டும் எனவும் விரும்புகிறோம். இதைத் தவிர இவ்விடயம் குறித்து விசேடமாக மேற்கொண்டு கூறுவதற்கு ஒன்றுமில்லை.
கேள்வி: தமிழக முதல்வர் பாட்டாளி மக்கள் கட்சித் தலைவர் இராமதாஸ் உட்பட மற்றைய தமிழகத் தலைவர்களைச் சந்திக்கப் போகிறீர்களா?

பதில்: இரண்டொரு நாட்களில் தமிழகத் தலைவர்கள் அனைவரையும் சந்திப்போம். அதேநேரம் முதல்வரை சந்திக்க நீங்கள் நேரம் கேட்டதாகவும் அதற்கு அவர் மறுத்ததாகவும் வெளியான செய்தி குறித்து கேட்கப்பட்ட மற்றொரு கேள்விக்கு நேரடியாக பதிலளிக்க சம்பந்தன் மறுத்துவிட்டார். தமிழகத்தில் உள்ள இதர அரசியல் கட்சித்தலைவர்கள் அனைவரையும் தாம் இரண்டொரு நாட்களில் சந்திப்பு பேசவிருப்பதாகவும் அவர் கூறினார்.

அனுராவுக்கு வைகோ கண்டனம்

இதேவேளை கூட்டமைப்பு நாடாளுமன்ற உறுப்பினர்களை கட்சி அலுவலக வாயில் வரை வந்து வழியனுப்பி வைத்த வைகோ செய்தியாளர்களிடம் கூறியதாவது:
பிரதமரின் வெளிநாட்டுப் பயணம் முடிந்தவுடன் கூட்டமைப்பு நாடாளுமன்ற உறுப்பினர்களுடனான சந்திப்பு நடக்கலாம்.

சிங்கள அரசின் இனவெறியும் தமிழர்களுக்கு எதிரான அராஜக மனப்பான்மையும் சிறிலங்கா அமைச்சர் அனுரா பண்டாரநாயக்கவின் வாக்குமூலத்தில் வெளிப்பட்டுள்ளது.
இந்தியத் தூதுவர் நிருபாமா ராவ் தனது இராஜிய வரம்புகளுக்கு உட்பட்டுத்தான் செயற்பட்டுள்ளார். அதற்காக அவரைக் குறை கூறிய விதம் கண்டனத்துக்குரிய என்றார்.
வைகோவுடனான சந்திப்பில் மாவை சேனாதிராசா, எம்.கே.சிவாஜிலிங்கம், பத்மினி சிதம்பரநாதன், கஜேந்திரகுமார் பொன்னம்பலம் ஆகிய கூட்டமைப்பு நாடாளுமன்ற உறுப்பினர்கள் கலந்து கொண்டனர்.

இதேவேளை தமிழக முதல்வர் கருணாநிதியை கூட்டமைப்பு நாடாளுமன்ற உறுப்பினர்கள் கடந்த 8 ஆம் திகதி சந்திப்பது என்றும் அதைத் தொடர்ந்து அன்று மாலையோ அல்லது 9 ஆம் திகதி காலையிலோ இந்தியப் பிரதமர் மன்மோகன் சிங்கை சந்தித்துப் பேசுவது என்றும் கூட்டமைப்பு நாடாளுமன்ற உறுப்பினர்கள் திட்டமிட்டிருந்ததாகவும் ஆனால் அத்திட்டத்தின் படி தமிழக முதல்வரைச் சந்திக்க இயலவில்லை என்றும் தெரிகிறது.
தமிழக முதல்வரைச் சந்திக்க முன் அனுமதி கேட்டு இரண்டு நாட்களுக்கு முன்னதாகவே தமிழ்த் தேசியக் கூட்டமைப்பு நாடாறுமன்ற உறுப்பினர்கள் கடிதம் அனுப்பியிருக்கிறார்கள். ஆனால் வைகோ மூலமாக பிரதமரைச் சந்திக்கும் அவர்களது திட்டம் குறித்து கேள்விப்பட்ட தமிழக முதல்வர் அதிருப்தி அடைந்ததாகவம் இதன் விளைவாக கூட்டமைப்பு நாடாளுமன்ற உறுப்பினர்களுடனான சந்திப்பை தள்ளிப்போட்டதாகவும் தெரிகிறது.

இந்நிலையில் கடந்த 8 ஆம் திகதி மதியம் கூட்டமைப்பு நாடாளுமன்ற உறுப்பினர்கள் புதுடில்லி சென்று இந்தியப் பிரதமரைச் சந்திக்க முடிவு எடுத்திருப்பதாக சென்னையில் பரபரப்பு ஏற்பட்டது.

வைகோ பிரதமரின் தனிச்செயலாளருடன் பேசி இச்சந்திப்புக்கு அனுமதி பெற்றுவிட்டதாகவும் 8 ஆம் திகதி மாலை கூட்டமைப்பு நாடாளுமன்ற உறுப்பினர்களை பிரதமர் சந்திப்பார் என்றும் மறுமலர்ச்சி திராவிட முன்னேற்றக் கழக வட்டாரத்தில் கூறப்பட்டது.

ஆனால் மாகராஸ்டிரா குண்டு வெடிப்புச் சம்பவம் மற்றும் கியூபா பயணம் குறித்த கடைசி நிமிட ஏற்பாடுகள் தொடர்பிலும் பிரதமருடனான சந்திப்பு கைகழுவப்பட்டதாககத் தெரிகிறது.

இந்நிலையில் சென்னையில் செய்தியாளர்களைச் சந்தித்த தமிழ்த் தேசியக் கூட்டமைப்பின் தலைவர் இரா.சம்பந்தன் விரைவில் தாம் தமிழகத்தில் உள்ள அனைத்து தலைவர்களையும் சந்தித்து பேச இருப்பதாகவும் தமிழக முதல்வரைச் சந்திப்பது உறுதி என்றும் கூறியுள்ளார்.
தமிழகத் தலைவர்களைச் சந்தித்த பிறகு கூட்டமைப்பு நாடாளுமன்ற உறுப்பினர்கள் புதுடில்லி சென்று காங்கிரஸ் தலைவர் சோனியா, பா.ஜ.க. தேசிய தலைவர்களைச் சந்திக்கத் திட்டமிட்டிருப்பதாகவும் தெரிகிறது.

ஆதாரம்: வீரகேசரி.

திருமலை நோக்கி கப்பல் 600 தமிழ் மக்கள் மனிதகேடயங்கள்.

செப்ரெம்பர் 9, 2006

படையினர் 1200 பேருடன் திருமலை நோக்கி கப்பல் 600 தமிழ் மக்கள் மனிதகேடயங்கள்.
காங்கேசன்துறை துறைமுகத்தில் இருந்து லங்கா முடித எனும் பெயருடைய கப்பல் ஒன்று 1200 படையினரை ஏற்றிக் கொண்டு 6 டோராக்கள் பாதுகாப்பு வழங்க சர்வதேச கடல் வழியாக திருமலை நோக்கி செல்கிறது.

படையினரிற்கு பாதுகாப்பாக 600 தமிழ் மக்கள் மனிதக் கேடயங்களாக கொண்டு செல்லப்படுவதாக செய்திகள் தெரிவிக்கின்றன.

இத் தமிழ் மக்கள் அனைவரும் யாழ்பாணத்தில் இருந்து தென்இலங்கைக்கு செல்லவிருந்தனர் என்பது குறிப்பிடத்தக்கது.
நன்றி>பதிவு.

இந்தியா, சிறிலங்கா அரசியலில் தலையிடக்கூடாது: அனுரா

செப்ரெம்பர் 9, 2006

சிறிலங்கா அரசியலில் இந்திய தூதுவர் நிருபமா ராவ் தலையிடுவதை சிறிலங்கா சுற்றுலாத்துறை அமைச்சர் அனுரா பண்டாரநாயக்க விமர்சனம் செய்துள்ளார்.
சிறிலங்கா நாடாளுமன்றத்தில் அவசரகால சட்ட மசோதா மீதான விவாதத்தின் போது அனுரா பண்டாரநாயக்க பேசியதாவது:
இனப்பிரச்சனைக்கு அரசியல் வழித்தீர்வுதான் காணப்பட வேண்டும். இராணுவ நடவடிக்கை தேவையில்லை.
இப்போது புலியை காயப்படுத்திருயிருக்கிறீர்கள். புலியை காயப்படுத்தினால் அது மிகவும் ஆபத்தானது. ஏனெனில் அது திருப்பித் தாக்கும்.
7 ஆண்டுகால ஆட்சிக்குப் பின்னர் சரவதேச தலைவர்கள் பட்டியலில் 32 ஆம் இடத்திலிருந்து 63 ஆம் இடத்துக்கு ஜோர்ஜ் புஸ் தள்ளப்பட்டுள்ளார்.
எதிர்வரும் ஆண்டு யூலை மாதத்தில் ரொனி பிளேயர் பொறுப்பிலிருந்து விலக உள்ளார்.
ஈராக் மீதான ஆக்கிரமிப்பு நடவடிக்கையால் அவர்களது மதிப்பு குறைந்துவிட்டன.
இனப்பிரச்சனையைப் பொறுத்தவரையில் முஸ்லிம்களும் ஒரு முக்கியமான அங்கம். 1938 ஆம் ஆண்டே கூட்டரசு முறையை பண்டாரநாயக்க வலியுறுத்தினார். கூட்டரசு முறையை வலியுறுத்திய முதல் சிங்களர் அவர்.
சம்பூரை கைப்பற்றியிருக்கலாம். ஆனால் அதனை தக்கவைக்கும் திறமையோடு இருக்க வேண்டும்.
ஒரு நாட்டை பிடிப்பது எளிது. அதனைத் தக்கவைப்பது கடினம் என்பார் நெப்போலியன்.
பாகிஸ்தானிய முன்னாள் தூதுவர் பசீர் வாலி மொகமெட் தன் மீதான தாக்குதலுக்கு இந்திய றோவை குற்றம்சாட்டியுள்ளார். எதுவித ஆதாரமுமில்லாமல் குற்றம்சாட்டப்பட்டுள்ளது.
சிறிலங்காவின் அரசியலில் இந்தியத் தூதுவர் நிருபமா ராவ் தேவையில்லாமல் தலையிடுகிறார். எமது நாட்டை நாம் பார்த்துக் கொள்கிறோம். நீங்கள் உங்கள் தூதரகப் பணியை பார்க்கவும்.
இந்திய-இலங்கை ஒப்பந்த காலத்தில் முன்னைய இந்தியத் தூதுவர் ஜே.என். டிக்சிட் நடவடிக்கையால் ராஜீவ் காந்தியை விலை கொடுக்க நேரிட்டது.
சிறிலங்கா அரசாங்கம் யாருடன் இணைந்து செயற்பட வேண்டும் என்பதை இந்தியத் தூதுவர் கூறக்கூடாது. ஐக்கிய தேசியக் கட்சியுடன் இணைந்து செயற்பட மகிந்த ராஜபக்ச ஏற்கனவே முடிவு செய்துள்ளார். ரணில் விக்கிரமசிங்கவும் புத்திசாலித்தனமாக இந்த நட்புறவை அங்கீகரிப்பார் என்ற நம்பிக்கை எமக்கு உள்ளது என்றார் அனுரா பண்டாரநாயக்க.
நன்றி>புதினம்.

சம்பூரிலிருந்து படைகள் வெளியேறாவிடில் போர்வெடிக்கும்.

செப்ரெம்பர் 8, 2006

சம்பூரில் இருந்து படையினரை விலக்கிக்கொள்ளாவிட்டால் தாக்குதல்களை மேற்கொள்ளவேண்டியிருக்கும் என தமிழீழ விடுதலைப்புலிகள் எச்சரித்துள்ளனர் தமிழீழ விடுதலைப்புலிகளின் சமாதான செயலர் புலித்தேவன் ரொயட்டரிடம் இந்த எச்சரிக்கையை விடுத்துள்ளார்.

படையினர் தாம் கைப்பற்றிய சம்பூரில் தொடர்ந்து நிலைகொண்டிருந்தால் அதனை போர் நிறுத்தத்தில் இருந்து அரசாங்கம் விலகிக்கொண்டதாகவே கருதவேண்டியிருக்கும் என அவர் தெரிவித்துள்ளார்.

நன்றி

இலங்கைக்கான இராணுவ உதவிகள் பாகிஸ்தானால் அதிகரிப்பு.

செப்ரெம்பர் 8, 2006

ஸ்ரீ லங்காவுக்கான இராணுவ உதவிகள் அதிகரிக்கப்படும் என்று பாகிஸ்தானின் உள்துறை அமைச்சரின் செயலாளர் கமல் ஷா தெரிவித்துள்ளதாக செய்தி வெளியிட்டுள்ளது.

அந்த செய்தியில் மேலும் தெரிவிக்கப்பட்டுள்ளதாவது:

பாகிஸ்தான் அரசாங்கத்தின் இலங்கைக்கான இராணுவ உதவிகள் எதிர்வரும் மாதங்களில் அதிகரிக்கப்படும். இரு நாடுகளுக்கான நட்புறவின் அடிப்படையில் இந்த இராணுவ உதவிகள் வழங்கப்படும். இலங்கைக்கு போர்த் தளபாடங்கள் மற்றும் போர் முறைமைகள், புலனாய்வு தகவல்கள், போர்ப் பயிற்சிகள் என்பன பாகிஸ்தானினால் வழங்கப்படும். இலங்கையின் முப்படையினருக்கு பாகிஸ்தானில் வழங்கப்படுகின்ற போர்ப் பயிற்சிகள் தொடர்ந்து நடைபெறும். இலங்கை பிரச்சினை பேச்சுவார்த்தை மூலமே தீர்க்கப்பட வேண்டும். இருப்பினும் தமிழீழ விடுதலைப்புலிகள் புலிகள் போரியல் ரீதியாக தோற்கடிக்கப்பட வேண்டும என்பதே பாகிஸ்தானின் விருப்பம் என்றும்.

ஏனெனில் இந்தியா விடுதலைப்புலிகளை தடை செய்திருப்பினும், வரலாற்று மற்றும் மத, பூர்வீகத்தொடர்புடைய இந்தியாவும், தமிழீழ விடுதலைப்புலிகளும் இணைந்தால் நிச்சயம் இந்தியாவின் ஆதிக்கம் தெற்காசியப்பிராந்தியத்தில் விஸ்பரூபம் எடுக்கும் என்று பாகிஸ்தான் கருதுவதால், அதை வழரவிடாமல் ஸ்ரீ லங்கா இராணுவத்திற்கு உதவிகளை வழங்கி அதனைத் தடுத்துவிடலாம் என்று பாகிஸ்தான் கருதுவதாக இந்திய அவதானி ஒருவர் கருத்து வெளியிட்டுள்ளார்.
நன்றி>பதிவு

இலங்கைக்குள் ஜக்கிய நாடுகள் சபை.

செப்ரெம்பர் 8, 2006

நா. சபையின் மனித உரிமை கண்காணிப்பு குழு இலங்கையில் ஏற்படுத்தப்படவேண்டும் – சிறப்பு பிரதிநிதி பேராசிரியர் பிலிப் ஓஸ்டன்
ஐக்கிய நாடுகள் சபையின் மனித உரிமை கண்காணிப்புக் குழுவொன்று இலங்கையில் ஏற்படுத்தப்பட வேண்டும் என்று நான் எதிர்பார்க்கின்றேன் என நீதிக்கு புறம்பான வகையில் நடத்தப்படும் கொலைகளை கண்காணிக்கும் ஐ.நா.வின் சிறப்பு பிரதிநிதி பேராசிரியர் பிலிப் ஓஸ்டன் தெரிவித்தார். பி.பி.ஸி தமிழோசைக்கு வழங்கிய விசேட செவ்வியிலேயே அவர் மேற்கண்டவாறு கூறினார்.

அவர் மேலும் கூறியதாவது:

இலங்கையின் தற்போதைய நிலைமையில் முக்கிய பிரச்சினைகள் இருக்கின்றது என்று நான் உணர்கின்றேன். கடந்த காலங்க ளில் காணாமல் போன சம்பவங்கள் குறித்து மனித உரிமை ஆணைக்கு ழுவின் செயற்பாடுகள் கைவிடப்பட்டமை மிகவும் கவலையளிக்கின்றது. நிபுணத்துவமிக்க விசாரணைகள் தேவைப்படுகின்ற சந்தர்ப்பத்தில் மனித உரிமை மீறல் தொடர்பான விசாரணைகள் நிறுத்தப்பட்டமை மிகவும் ஆரோக்கியமான தல்ல.

தற்போதைய நிலைமையில் பல முக்கியமான கொலைகள் குறித்த விசாரணைகளில் அரசாங்கம் செயற்பாட்டு திறனுடன் செயற்படவில்லை என்று நான் கருதுகிறேன். சம்பவங்கள் தொடர்பான வலுவான புலன்விசாரணைகளை நடத்த பொலிஸார் தவறிவிட்டனர். இந்நிலைமை பல பிரச்சினைகளை தோற்றுவித்துள்ளது. கொலைகளுக்கு ஒருவரை ஒருவர் குற்றம் சாட்டும் நிலைமைகள் ஏற்பட்டுள்ளன.

இலங்கையில் சீரழிவு நிலைமைகள் தொடர்ந்து வருவதால் அது நாட்டின் ஒட்டுமொத்த சமூகத் திற்கே அச்சுறுத்தலாக இருக்கின்றது. இந்த விடயங்களில் செயற்றிறன் மிக்க புலன் விசாரணைகள் அவசியம். இலங்கையில் இந்த வருடத்தில் மாத்திரம் 1200 பேர் கொல்லப்பட்டுள்ளனர். புலிகள் குறைந்தபட்ச விடயமாக மனித உரிமை காரியாலயத்தை உருவாக்கியிருக்கிறார்கள். இது சிறந்த முயற்சி. ஆனால் அது ஒழுங்காக செயற்படுத்தப்படவேண்டும். புலிகள் கொலைகளை கண்டிக்க ஆரம்பிக்க வேண்டும். மறுப்புகூறினால் மட்டும் கூடாது.

பொதுமக்கள் கொல்லப்படுவது மனித நேயங்களுக்கு எதிரான குற்றமாகும். எவர் இதனைச்செய்தாலும் அது மனித நேயத்திற்கு எதிரான போர்குற்றமாக கருதப்படும்.

மோதல்களில் எவர் முன்னுரிமை பெற விரும்பினாலும் அவர்கள் மனித உரிமைகள் தொடர்பான நம்பகத் தன்மையை உருவாக்க வேண்டும். பிராந்தியத்தை தமது கட்டுப் பாட்டில் வைத்திருப்பது என்பது எந்தவித நன்மையையும் தரப்போ வதில்லை. உள்ளூர் சமூகத்தினர் உணர்வுகளை மதித்தாகவேண்டும். இருதரப்பும் மனித உரிமைகளை மதிக்கவேண்டும்.

புலிகள் குறித்த விடயத்தில் நம்பகத்தன்மையில் பிரச்சினைகள் இருப்பதாக தெரிகிறது. புலிகள் நம்பகத் தன்மையை தெளிவுபடுத்த வேண்டும். எனவே மனித உரிமைகளை முக்கியமானதென கருத ஆரம்பிப்பதையும் முக்கியமற்றதான கொலைகளை நிறுத்துவதும் விடுதலைப் புலிகளை சார்ந்ததாகும்.

கருணா அல்லது ஏனைய குழுக்களின் பேரில் இலங்கையில் நடக்கும் அனைத்தையும் தடுக்கவேண்டிய அரசாங்கத்தின் சக்தி குறித்து மிகைப்படுத்திக் கூற நான் விரும்பவில்லை. கருணா குழுவை அரசாங்கம் கண்டனம் செய்திருப்பது மற்றும் அதன் நடவடிக்கைகளில் இராணுவத்திற்கு தொடர்புகள் இருக்கக் கூடாது என்று அரசாங்கம் அதிகார பூர்வமாக கூறியிருக்கின்றமை ஆகிய இரண்டும் யதார்த்தமாக வெளிப்படுத்தவேண்டும். கருணா அணியுடன் ஒத்துழைப்பதில்லை என்ற விதியை இராணுவம் கடைப் பிடிப்பதாக கூறப்படுவதில் எனக்கு திருப்தி இல்லை.

மோதல்களின் போது மனித உரிமைகள் பாதுகாக்கப்படுவது இருதரப்பினாலும் உறுதிப்படுத்தப் படல்வேண்டும். முதலில் மோதலை தீர்ப்போம். பின்பு மனித உரிமைகளை மேம்படுத்துவோம் என்று கூறப்படுவது தவறானதாகும். இருதரப்பும் செயற்படும் விதத்திலே
நன்றி>புதினம்.

நோர்வேயை வெளியேற்றவேண்டும்-ஜே.வி.பி.

செப்ரெம்பர் 7, 2006

சம்பூர் பிரதேசத்தை இராணுவம் கைப்பற்றி அங்கிருந்து புலிகளை வெளியேற்றியது போன்று அனுசரணைப் பணியிலிருந்தும் நோர்வேயை அரசாங்கம் அகற்றவேண்டும் என்று ஜே.வி.பி. யின் பிரசார செயலாளரும் கொழும்பு மாவட்ட எம்.பி. யுமான விமல் வீரவன்ச சபையில் வேண்டுகோள் விடுத்தார்.கிழக்கு மாகாணத்திலிருந்து புலிகளை முற்றாக வெளியேற்றி வட க் கிலிருந்து கிழக்கு மாகாணத்தை பிரிக்க வேண்டும். அதற்காக பாரிய இராணுவ நடவடிக்கை உடனடியாக ஆரம்பிக்க வேண்டுமென்றும் அவர் கேட்டுக் கொண்டார்.
இராணுவ ரீதியாக புலிகளை வெல்ல முடியாது என்ற மாயை சம்பூரை இராணுவத்தினர் கைப்பற்றியதன் மூலம் தகர்த்தெறியப்பட்டுள்ளதாகவும் விமல் வீரவன்ச கூறினார்.
பாராளுமன்றம் நேற்றுக் காலை 9.30 மணியளவில் சபாநாயகர் வி.ஜே.மு. லொக்குபண்டார தலைமையில் ஆரம்பமானதும் எம்.பிக்களுக்கான வாய்மூல கேள்வி நேரம் இடம்பெற்றது. அது முடிவடைந்ததும் சபாநாயகரின் அனுமதியுடன் விமல் வீரவன்ச எம்.பி. விசேட கூற்று ஒன்றை முன்வைத்த போதே மேற்கண்டவாறு தெரிவித்தார்.
சம்பூர் பிரதேசத்தை புலிகளிடமிருந்து கைப்பற்றியமைக்காக இராணுவத்தினரை பாராட்டி முன்வைத்த விசேடகூற்றின் போது மேலும் தெரிவித்ததாவது:
புலிகளை வெல்ல முடியும்இராணுவ ரீதியாக புலிகளை வெல்ல முடியாது என புலிகளைப் பற்றி புகழ்பாடுகின்ற சிலர் கூறி வந்தனர். புலிகளும் அவ்வாறானதொரு மாயை வெளிப்படுத்தி வந்தனர். ஆனால் நடந்தது என்ன? சிறியரக ஆயுதங்களை பயன்படுத்தியே சம்பூரை இராணுவம் கைப்பற்றியது. புலிகள் தற்போது அங்கிருந்து விரட்டப்பட்டுள்ளனர். புலிகளை இராணுவ ரீதியாக வெற்றி கௌ;ள முடியும். ஈழம் என்ற தேவையை அடிப்படையாகக் கொண்டு போராடிய பிரபாகரனின் தீவிரவாதம் அடக்கப்பட்டுள்ளது என்பதற்கு சம்பூர் நல்ல உதாரணம்.புலிகளை விரட்ட வேண்டும் சம்பூர் பிரதேசத்திலிருந்து புலிகளை விரட்டியது போன்று கிழக்கு மாகாணத்தின் அனைத்து பகுதிகளிலிருந்தும் புலிகள் விரட்டியடிக்கப்பட வேண்டும். அவ்வாறே வட மாகாணத்திலும் அவர்களை விட்டு வைக்கக் கூடாது. வடக்கு மாகாணத்திலுள்ள பிரபாகரனின் சித்திரவதை முகாம்கள் அழிக்கப்பட வேண்டும். புலிகளுக்கு எதிரான யுத்தம் ஒன்றை தொடுத்து அவர்களை வெற்றி கொள்வதற்கான மனத்திடம் இராணுவத்திற்கு உண்டு.
பலம் இழந்த புலிகள்சம்பூரை இராணுவம் கைப்பற்றிய பின்னர் புலிகள் பலம் இழந்து விட்டனர். மனதளவில் புலிகள் குழம்பி விட்டனர். சம்பூரை இராணுவம் கைப்பற்றிய பின்னர் இலங்கை மக்கள் மகிழ்ச்சியடைந்துள்ளனர். இராணுவத்தினர் உற்சாகமடைந்துள்ளனர். சகல மக்களையும் பாதுகாக்க வேண்டியது அரசின் பொறுப்பு. அந்தக் கடமையைத்தான் ஜனாதிபதி செய்துள்ளார். நோர்வே வெளியேற வேண்டும்
அனுசரணைப் பணியிலிருந்து நோர்வே வெளியேற வேண்டும். சம்பூரை இராணுவம் கைப்பற்றியது போன்று அனுசரணைப் பணியிலிருந்து நோர்வேயை வெளியேற்ற வேண்டும். இராஜதந்திர ரீதியான தொடர்புகளை மாத்திரம் நோர்வேயுடன் வைத்துக் கொண்டு சமாதான முயற்சிகளிலிருந்து அவர்களை வெளியேற்ற வேண்டிய அவசியம் எழுந்துள்ளது. சம்பூரை கைப்பற்றும் நடவடிக்கையில் உயிர் நீத்த படை வீரர்களுக்கு நாங்கள் அஞ்சலியை செலுத்துகின்றோம். காயமடைந்த இராணுவ வீரர்கள் குணமடைய வேண்டுமென பிரார்த்திக்கின்றோம்.
நன்றி>பதிவு.

மூதூர் படுகொலை: அக்சன் பார்ம் பணிகள் குறைப்பு.

செப்ரெம்பர் 6, 2006

சிறிலங்கா இராணுவத்தினரால் மூதூரில் தமது நிறுவனப் பணியாளர்கள் 17 பேர் படுகொலை செய்யப்பட்டமையைத் தொடர்ந்து பிரான்ஸ் நாட்டைச் சேர்ந்த அக்சன் பார்ம் நிறுவனம் தனது பணிகளை குறைத்துக் கொள்வதாக அறிவித்துள்ளது.
இது குறித்து அந்த அமைப்பின் தலைவர் எரிக் போர்ட் வெளியிட்ட அறிக்கை:
ஆழிப்பேரவை நிவாரணப் பணிகளை மேற்கொண்டிருந்த அமைப்பானது பணியாளர்களின் எண்ணிக்கையை 60 முதல் 70 விழுக்காடு குறைக்க முடிவு செய்துள்ளது.
நாங்கள் இலங்கையிலிருந்து வெளியேறவில்லை. ஆனால் எமது செயற்பாடுகளை குறைத்துள்ளோம். பாதுகாப்புக் காரணங்களை முன்னிட்டு இந்நடவடிக்கை மேற்கொள்ளப்படுகிறது.
இலங்கைக்கு எமது அமைப்பினால் ஒதுக்கீடு செய்யப்பட்ட நிதி அளவும் குறைக்கப்பட்டுள்ளது. அரச சார்பற்ற நிறுவனங்கள் இயங்குவதற்கு ஏதுவான சூழ்நிலை இந்நாட்டில் இல்லை என்று அந்த அறிக்கையில் தெரிவிக்கப்பட்டுள்ளது.
நன்றி>புதினம்.